अजूनही आठवतं मला !!!

अजूनही आठवतं मला,
एक तानुली बहिण गादीवर खेळत असलेली
तीट लावलेल्या गालावर खळी ती पडलेली

अजूनही आठवतं मला,
तुझा हात हातात घेऊन, शाळेत सोडायला आलेलं
सुट्टीच्या दिवशी दोघे एकटे घरी राहिलेलं

अजूनही आठवतं मला,
पातेल्यातली साय आपसूक मिळायची
पण सायीच्या पातेल्यासाठी भांडणं व्हायची...
त्यातही बरोबरीची वाटणी असायची...अन
साय काढण्यासाठी आई नंबर लावून द्यायची

अजूनही आठवतं मला,
जी कथा सायीच्या पातेल्याची...
तीच तऱ्हा फोडणीच्या भाताची आणि तुपाच्या बेरीची

अजूनही आठवतं मला,
ते सायकलवर शाळेत सोडायला येणे... अन
आणायला आल्यावर पेरूवाल्या शेजारी
उभं राहून तुझी वाट पाहणे....

अजूनही आठवतं मला,
शाळा सुटण्याच्या वेळेला ते वंदे मातरम ऐकलेलं
अन तुला सायकलवर डबलसीट घेऊन घरी आलेलं

अजूनही आठवतं मला,
दिवाळीच्या वेळेला फटाक्यांची वाटणी असायची
आणि आधी कोणाचे संपतात यात शर्यत लागायची
अर्थात मीच नेहमी पुढे असायचो कारण,

अजूनही आठवतं मला,
मला फटाके वाजवूदेत म्हणून तू केलेली विनवणी
आणि तुझे फटाके संपवण्यासाठी मी केलेली मदत

अजूनही आठवतं मला,
तुझा दहावीचा लागलेला निकाल...अन मग
कॉलेजच्या अ‍ॅडमिशनसाठी भरलेला तो फॉर्म

अजूनही आठवतं मला,
सकाळ सकाळ तू कॉलेज ला गेलेली
क्लास बंक करून लवकर घरी आलेली

अजूनही आठवतात मला
अशा असंख्य आठवणी,
ज्या मनात कायम स्वरूपी राहतील
लांब असून सुद्धा तू कायम जवळच राहशील